作為香港人嘅comfort food，港式嘅冰室同茶餐廳真係隨街都搵到一兩間，要突圍而出，除咗價錢、味道之外，多元化嘅菜式相信係銅鑼灣維港冰室嘅魅力所在。港式飽餅、焗飯碟頭飯、鐵板餐等，而小菜嘅選擇就連酸菜魚都有，真係花多眼亂呀！
蛋撻
蛋撻係酥皮底，非常鬆脆，而且蛋味香濃，絕配當然要加上一杯香滑濃郁嘅港式奶茶啦！
招牌黑椒牛柳王牌鐵板套餐
港式鐵板餐嘅牛扒質素當然無得同西式扒房相比，但維港冰室嘅出品亦絕不失禮，絕對係茶餐廳嘅豪華之選！五成熟嘅牛柳，生熟度啱唔好，肉汁豐富而肉質嫩滑！至於牛柳嘅賣點係牛味香濃，淋上微辣嘅黑椒汁，絕對係最佳拍擋。薯菜係有一整個焗薯，真係夠曬飽肚呀！
招牌酸菜魚套餐
去冰室茶餐廳最正係選擇多，小菜更加以酸菜魚作招牌呢！酸菜魚嘅魚片相當滑溜，配菜方面除咗酸菜，仲有相當多嘅萵筍同什菇作為襯托。至於酸辣嘅平衡啱啱好，唔會過酸或過辣，用嚟送飯相當唔錯。
